دليل موجه للأشخاص المصابين بداء السرطان وأقربائهم

التغذاية والشيميو -بالدارجة المغربية-

  يتحدث المقال عن أهمية نظام غذائي صحي ومتوازن للمرضى المصابين بالسرطان ويقدم نصائح عملية لتحسين جودة الحياة والتعامل مع الأعراض الجانبية. 

سرطان، نظام غذائي، علاج، علاج كيميائي، إشعاع، جودة الحياة، الأطعمة الصحية، السكريات، الدهون المشبعة، الملح، الرياضة، النوم، الإجهاد، التوتر، المواعيد الطبية، الفحوصات، التغييرات الصحية، النصائح الطبية، العيش بشكل أفضل. 

     خلال مدة علاج السرطان، لازم على المريض يتبع واحد النظام غذائي معين لي يقذريساعدو باش يقاوم هاذ المرض، و في نفس الوقت يقدريتغلب به على الكثيرمن الأعراض الجانبية ليمكن تيتسبب بها العلاج الكيماوي أو الأشعاعي.
    في بعض الحالات الخاصة، لازم المريض إتبع حمية أو نظام غذائي خاص بالحالة ديالو، ولي ممكن يشرحوه ليه الأخصائيين في التغذية أو الأطباء.

س1: شنو هما الأغذية لي نقدر ناكل؟ حيت سمعت الناس تيقولو مناكلش الحم، الحليب، الدجاج، أُغيرو...

        ج1: أول حاجة، خاصني نعرفها، منسمعش لشيحد من غير طبيب، الممرض، و الأخصائي في التغذية. بالنسبة لتغذية، جميع المجموعات الغذائية مسموحة، بغض النظر على بعض الحالات الخاصة.
    لي خاصكم تعرفو، باش إتجاوب الجسم ديالكم مع العلاج ، خاصكم تنظمو تغذية ديالكم مزيان.

س2: أشنو نقدر نكل قبل الحصة باش نتجاوب مع العلاج؟

        ج2 : فالمرحلة الأولى: يومين قبل الحصة، تنوجد الجهاز الهضمي بتناول تغذية خفيفة. وساهلة فالهظم لأن العلاج الكيميائي تيأثر على الجهاز الهضمي، من الفم حتى للمَخْرَج وتيولي رهيف و حساس. و هاذ النوع من التغذية تيعاون لمريض تيغلب على الأعراض الجانبية نتع الحصص الكيميائية وبالتالي واجب على المريض يكل أغذية خفيفة ويحدف كل غذاء صعيب في الهضم أوغني بالمواد الذهنية.

س 3 : شنوهما المشروبات لي نقدر نشربها بلاما تأثر على الصحة ديالي؟

        ج 3 : المشروبات أو السوائل لي ممكن تشربوها بدون أي إشكال: أولا الماء لي هو عنصر أساسي، و خصوصا خلال الحصة، حيت تَتنشف الذات منو و بالتالي خاصكم تخدو كمية كبيرة منو، على الأقل 2 لترو في اليوم. من غير بعض الحالات الخاصة، لي تيخفض ليهم الطبيب ديالهم الماء ولي ممكن إشكل عليهم خطورة.
    أما النسبة لأتاي فممكن تشربوه وقتما بغيتو بخلاف القهوة لي خصكم تخدوها خفيفة مشي قاصحة أو مقطرة.
    أما بالنسبة للعصير، فهو مسموح إلا كان ديال دار, ومنساوش قبل منصاوب العصير نغسل مزيان الفواكه، وكذلك العصارة.

    أما بالنسبة للعصير لمصاوب خارج البيت ممكن تناول إلا كنت عارف شيحد نْقِي تَيغسل مزيان الفواكه و كذلك العصارة بعد كل إستعمال. مسموح شرب المياه الغازية أما المونادا فهي ممنوعة.

س 4: بنسبة لخبز، لعدس، لفول و كسكسو، ناكولهم أولا لا؟

        ج 4: تَتْعني مجموعة النشويات و القطنية. هاذ المجموعة تتميز بالطاقة و خاصها تخاد في كل وجبة وتَتْكُوَنْ من المعجنات بحال الشعرية والمحمصة...؛ الخبزأو الحبوب مثل: القمح، االذرة، الروز و البلبولة...؛ لبطاطة؛ و القطنيات لهي: لعدس، لحمص، لوبيا البيضة أو لحمراء، لفول...

    عناصر هاذ المجموعة مسموحة من غير القطاني. أما الخبز ممكن تناولو أَيْ نوع من لخبز، ولكن مَخاصنيش ناخدو سخون عاد خرج من الفران. نخليه إبرد شوية، عاد ممكن نتناولو.

س5: شنوهما أنواع الخضر و الفواكه لممكن نستهلكها؟

        ج 5: مجموعة الخضر و الفواكه، غنية بمضادات الأكسدة لي تَتْساعد على العلاج و محاربة الخلايا السرطانية. و كذلك فهي معروفة بالألياف و الفيتامينات.
    أما بالنسبة للخضر لي مسموح نتناولها في هذه المرحلة فهية: لخس، دنجال، لقوق، لوبيا لخضرة، بسباس، خيزو، لكرعة لحمرا و الخضرا، لباربة، سبانخ، بقولة، قزبر، معدنوس، كرافس، مطيشة.
    منساوش نغسلوها مزيان قبل مانستعملوها. نديروها فإناء مع قطيرة ديال جافيل. من بعد نخوي الماء، ونشللها 2 مرات على الأقل.
    أما الخضر لي تقدر تسبب ليك بعض المشاكل فهية تتميز برائحة قوية و صعبة الهضم بحال: لكروم أو لمكور الأحمر أو الأخضر، بروك زيتون.ولي، جلبانة، خيار، ثوم، بوارو، شفلور، فلفل، فطريات، بصل، خضر معلبة، والخضر المخللة لي تلقاوها متواجدة عند بائع زيتون.

الكتب المرجعية:

"The Cancer-Fighting Kitchen: Nourishing, Big-Flavor Recipes for Cancer Treatment and Recovery" by Rebecca Katz and Mat Edelson
"The Anti-Cancer Diet: Reduce Cancer Risk Through the Foods You Eat" by David Khayat
"Eating Well Through Cancer: Easy Recipes & Tips to Guide You Through Treatment and Cancer Prevention" by Holly Clegg and Gerald Miletello
"The Complete Cancer Cleanse: A Proven Program to Detoxify and Renew Body, Mind, and Spirit" by Cherie Calbom and John Calbom

المواقع المرجعية:

American Cancer Society: Diet and Physical Activity for Cancer Prevention (https://www.cancer.org/healthy/eat-healthy-get-active/acs-guidelines-nutrition-physical-activity-cancer-prevention.html)
National Cancer Institute: Nutrition in Cancer Care (https://www.cancer.gov/about-cancer/treatment/side-effects/appetite-loss/nutrition-pdq)
Cancer Research UK: Diet and Cancer (https://www.cancerresearchuk.org/about-cancer/causes-of-cancer/diet-and-cancer)
Mayo Clinic: Cancer Nutrition Tips (https://www.mayoclinic.org/diseases-conditions/cancer/in-depth/cancer/art-20047132)

تعديل المقال